Во рамките на Месецот на ретките болести, кој секоја година се одбележува во февруари, како најкраткиот месец во годината, со „редок“ број денови – 28 или 29 во престапна година, Комисијата за спречување и заштита од дискриминација (КСЗД) и Националната алијанса за ретки болести потпишаа Меморандум за соработка. Ова партнерство претставува значаен чекор во борбата за еднакви права, системски промени и поддршка за лицата со ретки болести и нивните семејства.
Со овој меморандум се утврдуваат начините за заедничка координација и имплементација на активности за промоција, заштита и унапредување на правата на лицата со ретки болести и нивните семејства, борбата против дискриминацијата и обезбедување еднакви можности, поттикнување на системски промени за подобар третман и инклузија и вклучување на лицата со ретки болести во сите социјално-општествени процеси.
Оваа соработка е значаен чекор кон подобрување на условите и третманот на лицата со ретки болести во нашата земја, обезбедувајќи им поддршка и заштита на нивните права. Со потпишувањето на овој меморандум во месецот на ретките болести, КСЗД и Националната алијанса за ретки болести ја нагласуваат посветеноста кон создавање инклузивно и правично општество за сите!