Претседателот на државата, Стево Пендаровски изрази поддршка за институционалната независност на Комисијата за спречување и заштита од дискриминација. На денешната средба на Претседателот со членовите на Комисијата, тој ги поздрави напорите на КСЗД за подигање на јавната свест, информирање и едукација на граѓаните за видовите на дискриминација со кои се соочуваат.
Членовите на Комисијата го информираа Претседателот за предизвиците во работата и формирањето на институцијата, како и за постигнатите резултати во првата година од функционирањето.
На средбата беше презентирана работата на Комисијата, досегашното постапување по поднесени претставки, како и активностите за промоција на човекови права и елиминирање на сите видови дискриминација.
Претставниците на Комисијата и Претседателот Пендаровски договорија продлабочување на соработката меѓу двете институции во насока на промоција на активностите за сузбивање и борба против дискриминација.