Кандидатите за градоначалници да го вклучат прашањето во програмите за локалните избори.
Комисијата за спречување и заштита од дискриминација, по повод јавните изјави за дислокација на ромски семејства од депонијата Вардариште, потсетува дека на 09.07.2025 година, донесе Општа препорака за домување. Со неа, КСЗД укажа на обврските на општините и институциите да обезбедат системски и недискриминаторски мерки за: достапно и соодветно домување, спроведување на урбанистичко планирање, легализација на домувањето, подобрување на инфраструктурата, административна и социјална поддршка за жителите на неформални и супстандардни населби.
КСЗД нагласува дека краткорочни мерки за „раселување“ без обезбедени соодветни алтернативи и услуги создаваат ризик од нови кругови на маргинализација. Наместо тоа, решението е во интегрирано планирање – уредување и обновување на просторот, пристап до јавни услуги и правна сигурност за жителите, со фокус на достоинството и еднаквоста.
Правото на домување е темелно човеково право и е неразделно поврзано со сите други човекови права. Тоа мора да се обезбеди за сите лица, без оглед на нивниот приход или пристап до економски ресурси.
КСЗД повикува, кандидатите за градоначалници на претстојните локални избори, да го вклучат прашањето за домувањето во своите изборни програми, како приоритет за развој на инклузивни и еднакви локални заедници.