Меѓународниот ден на лицата со попреченост претставува потсетник за потребата од посветена, системска и одржлива поддршка за сите лица кои се соочуваат со бариери во своето секојдневие. Овој ден го нагласува значењето на еднаквиот пристап, почитувањето на различностите и создавањето опкружување во кое секоја личност може да го достигне својот целосен потенцијал.
Оваа година, под глобалното мото „Градење инклузивни општества за унапредување на социјалниот напредок“, фокусот е ставен на заедничката одговорност – институции, организации, заедници и граѓани – да креираат услови што ќе обезбедат еднакво учество, достоинствен живот и остварување на човековите права за сите лица со попреченост.
Во духот на оваа глобална порака, Комисијата за спречување и заштита од дискриминација (КСЗД) и Републичкиот центар за поддршка на лица со интелектуална попреченост – ПОРАКА, денес потпишаа Меморандум за соработка.
Овој документ претставува важен чекор кон институционално и програмско поврзување, насочено кон подобрување на заштитата од дискриминација и обезбедување поголема поддршка за лицата со интелектуална попреченост и нивните семејства.
Со овој Меморандум, двете институции се обврзуваат на: унапредување на пристапот до правата и услугите, заеднички активности за подигање на јавната свест и намалување на стигмата, развивање иницијативи за инклузивни политики и програми, засилена соработка при постапување по случаи на дискриминација, промовирање еднакви можности и активно учество на лицата со попреченост во сите сфери на општествениот живот.
Градењето инклузивни општества не е еднодневна активност, туку постојан процес што бара партнерства, посветеност и визија. Преку оваа соработка, КСЗД и ПОРАКА ја изразуваат својата решеност да придонесат кон општество во кое разликите не се пречка, туку вредност што нè збогатува.
На овој 3 Декември повторно ја испраќаме пораката дека човековите права се универзални и неделиви, а инклузијата е основа на напредокот.
Само со заеднички напори можеме да изградиме заедници кои го почитуваат достоинството, автономијата и гласот на секоја личност.